Takk for oss!

Etter fem år med eksperimentering og moro, avsluttast no kapittelet Klangkollektivet. I 2012 gjekk ein gjeng entusiastiske og idealistiske musikkelskarar saman for å løfte Bergens undergrunn til overflaten – ikkje berre byens overflate, men til resten av landet og eit internasjonalt publikum.

Som bookingbyrå, plateselskap og studio har Klangkollektivet vore ei eksperimentell leikegrind som har betalt seg i opplevingar og erfaring me aldri ville ha fått annan stads frå. Og aldri ville ha vore forutan.
Me har vore på på Eurosonic og Roskilde med Electric Eye, på by:Larm og Spot med Línt, SXSW med Alexander von Mehren, på Urørt-finalen med Ekkolodd, Trondheim Calling med Lumikide, Vill Vill Vest med Elida og i Kina med Monstereo. For å nemne noko.

Me har oppnådd dei mål og ambisjonar me sette oss for fem år sidan, når både me og artistane har testa ut forretningsmodellar og strategiar for å presentere snevrare musikalske uttrykk til eit større publikum. Artistane skal fly vidare, og det same skal kreftene bak. ’Klangarane’ som dei har kalla seg, vil fortsetja med kulturrelatert arbeid eller studiar, dagleg leiar og initiativtakar Solgunn Slåtto med ein master ved Copenhagen Business School.

Rørsla Klangkollektivet er unik, men ikkje modellen. Skogen av ulike musikkselskap som har dukka opp etter me starta står i full blomst, og vitnar om eit sterkt undergrunns-Bergen. Me starta fordi det mangla ein inkubator for mellomsjiktet av artistar i Bergen. Ser me på byens mylder av små selskap i dag, er me absolutt ikkje bekymra for verken undergrunnsmiljøet eller mellomsjiktet.

Bergen er unik når det kjem til fellesskap og deling i bransjen. Klangkollektivet ynskjer å dele det me kan med krefter som kjem etter oss. Selskapet overrekk difor malar og verkty, som platekontrakten, til Brak, med tanke om å hjelpe nye som startar opp liknande initiativ. Også eit pluss at den er på nynorsk – mykje lettare å forstå enn jusspråket! Vil gjerne rette ein stor takk til Bergen Kommune, som saman med Brak vore viktige støttespelarar sidan starten, aksjonærane som sto for kronerulling i starten, og til styret med Frøydis Moberg i spissen.

Me feirar 5 års suksess for norsk og bergensk musikk med ein siste klangkveld på Østre 18. mars , der det har blitt halde årlege klangkveldar sidan lanseringa 9. november 2012. På scena står Línt, Monstereo og Ekkolodd, som har vore med frå starten. I tillegg presenterer me, tradisjonen tru, eit nytt namn frå våre naboar i sør: danske The Entrepreneurs. Først av alt snakkast me på byLarm! Kom innom og sjå Elida på Agenturet-showcase på Dattera torsdag 2. mars kl 18:20!

Me takkar og bukkar for all merksemd, samarbeid og støtte opp gjennom – og sjåast i nye samanhengar, på nye konsertar, og gjennom nye prosjekt. Takk for oss!

Lumikide med ny singel: Den vanskelege kjærleiken

Skjørt men sjølvsikkert om ung kjærleik: «Explorers and Destroyers» handlar om når du får vite så mykje at det øydelegg alt.

Lumikide på tur turné Klangkollektivet coverart: Benedikte Olsen

Singelen er spelt inn i Greener Productions Studio av Karl Klaseide i Trondheim, miksa av Matias Tellez i Skogen Studio og mastra av Jørgen Træen på Bergen Kjøtt.
«Det neste store fra Bergen»
– Bergensmagasinet

Høyr singelen på Spotify // Tidal // Soundcloud

Ut på tur
I mars har dei med seg eit nytt medlem, bassist Jonas Krøvel frå Urørtfinale-aktuelle Pom Poko, og tar ut på turné. Fang dei ein stad nær deg!
Oslo // Kampen Bistro // 23.mars
Bergen // Hulen // 24.mars
Tromsø // Hålogaland Teater // 30.mars
Trondheim // Lobbyen // 31.mars

Klangkveld #5 på Victoria

Det er klart for årets Klangkveld! Som vanleg likar me å dele bursdagsfeiringa med andre, og i år feirar me med vårt ferskaste medlem, Elida Høgalmen, som gir ut sin aller første singel! «The End» er starten på vårt forhold, og blir å oppleva i byens trivlegaste stove denne kvelden. Det blir fleire andre ting, følg med for oppdateringar!

klangkveld_klangkollektivet_johanne-karlsrud_jahjah

Elida Høgalmen si søkjande, insisterande og undrande stemme drar oss inn i hennar forunderlege og melankolske sinn av kjensler. Med eit utforskande band i ryggen skapast spanande komposisjonar og grasiøse melodilinjer som løftar hennar særeigne vokaluttrykk, og gir oss fengslande oppturar med gåsehud. Elida har fanga oss.

Nesten Kult er Anna-Victoria, Xin og Haley, som kvar veke tar deg gjennom eit bestemt tema innan musikken; alt frå fest til breakups. Dei inviterer gjester med kul musikksmak,  opnar sinnet ditt i spalta Dypdykk og gir deg tips til kva som skjer i verdas beste by; Bergen.

Andreas Høvset kjenner me best som låtskrivar, produsent og vokalist i Verdensrommet (såg du konserten under Vill Vill Vest?!). Men Andreas har mange sider, som blir avdekt ei etter ei om dagen. Både gjennom Verdensrommet, som har endt i ei finurleg deilig blanding av indie, jazz, hip hop og elektronisk musikk, saman med Emir Sushi, og solo. Me har spurt om å få vera fluge på veggen i studioet, som me i høve klangkvelden er flytta til Viccen.

Mato Grytten
I tillegg til å vera produsentane bak the Hester V75 beats, har Mathias Olaussen og David Grytten blitt velkjente partyfixers bak DJ-pulten. I tillegg til rapbangarar og anna basstung musikk som får sveitten til å renna på dansegolvet, har visst gutane også ein ting for musikk som inkluderer gitar og blaut vokal. Trur me. Klangkvelden will show!

Dørene opnar 19:00
Kalaset kostar 80 peng
Facebook-hending

Nysignering: Velkommen i Klangkollektivet, Elida Høgalmen!

Med si insisterande og undrande stemme, melankolske univers og utforskande band fanga Elida oss under Vill Vill Vest. Me er stolte over å kunne presentere Elida m/ band som del av Klangkollektivet, og gler oss til utgiving seinare i haust!

elida Høgalmen foto-per-elling-kobberstad-mindre-crop

Gjennom dissonerande vokalharmoniar byggast ein stille intensitet opp. Med eit utforskande band i ryggen skapast spanande komposisjonar og grasiøse melodilinjer som løftar Elida sitt særeigne vokaluttrykk, og gir oss fengslande oppturar med gåsehud.

Første singel vart spelt inn i Klangkollektivet Studio på Bergen Kjøtt sist helg, og kjem ut i løpet av hausten. I mellomtida kan du nyte herlege lo-fi soveromsinnspelingar på Soundcloud!

Elida på Soundcloud
Elida på Facebook

Lumikide på Vill Vill Vest: «Det neste store fra Bergen»

Lumikide Vill Vill Vest Klangkollektivet Foto: Bergensmagasinet/ Øyvind Toft

«Midt under Lumikides konsert på Hulen fredag ble det helt stille. Publikum og bandet forsvant, i stedet kom det frem et svært troll fra urskogen i Os. «No skjer da igjen» var budskapet» skriv eit begeistra Bergensmagasinet etter Lumikides Vill Vill Vest-konsert, som rett og slett kallar popkvartettet «det neste store frå Bergen».

Les meldinga av konserten her

– Folk er så flinke til å jobbe sammen og inkludere hverandre i miljøet. Jeg liker veldig godt å bo her. Også er det det med Vill Vill Vest, at det skjer sånne ting, det er helt fantastisk. Da får flere sjansen til å komme opp og frem.
Birgitta i intervju i Utetrend

Bildegalleri på GAFFA

Takk for i år, Vill Vill Vest, me gler oss allereie til neste år!

Lumikide «Tornado»: ny singel frå den lovande popkvartetten

Ei veka før dei entrar scena på Bergens nye showcase-festival, Vill Vill Vest, slepper Lumikide singelen «Tornado» – «et slags fuck you til en teit gutt som ikke skjønner at du ikke vil ha ham». 

Frå det sarte og skjøre til det impulsive og nesten aggressive, med Kate Bush-vibber og fortryllande synthmelodiar, fangar Lumikide oss igjen med ny låt. Den andre singelen frå kvartettens komande debutalbum gir oss nok ein grunn til å sjå fram til fullengdaren, med utgivingsdato lagt til februar 2017.

«Vi ville rendyrke groove-elemetet i låta, med få og gjentakende elementer som sammen bygger opp en skummel uværssky av en groove, og lande i et eksplosjon av et refreng som griper fatt i deg og forhåpentligvis knuser alle forsvarsverk; I am a tornado / Uprooting your ego»
– Martin Miguel Almagro Tonne, låtskrivar og gitarist

Bergens nye stoltheit Vill Vill Vest går av stabelen 15. og 16. september, og presenterer 48 artistar på 9 av byens beste scenar. Lumikide spelar fredagen, kl 22:30 på Hulen. I tillegg til konsertprogrammet, står interesseorganisasjonen Brak for eit imponerande seminarprogram på dagtid. Me gler oss til å ta i mot norske og internasjonale delegatar i Noregs musikkhovudstad – og ikkje minst eit stort heimepublikum rundt på dei beste spelestadene i byen!

«Tornado» på Tidal / Spotify
Musikkvideo «Golden» frå i sommar
Lumikide på Facebook

Lumikide på Vill Vill Vest Facebook-event

 

Línt signerer til Tyskland!

Etter sin første utanlandske konsert på Spot-festivalen i Århus, Danmark i april, vart Línt plukka opp av ein begeistra gjeng frå tyske Popup Records. Møtet ende i platekontrakt, PR- og bookingavtale for Tyskland, Sveits og Austerrike.

Foto: Magnus Haaland Sunde

2017 blir dermed eit år for kontinentutforsking for bandet, som albumdebuterte med kritikarroste «Then They Came For Us» i 2015. Det er dette som no skal distribuerast nedover Europa.

«Trips» er allereie handplukka av ei rekkje store radiokanalar i Tyskland. I oktober ventar verdspremiere på ny musikkvideo til singelen, og 11. november lanserast albumet i dei tyskspråklege land på kontinentet. Tidleg 2017 ventar turné i Tyskland, Sveits, Austerrike – og Danmark. Før bandet reiser frå Noreg, gir dei konsert for heimepublikummet på Hulen i Bergen 4. november.

«Storslått postrockperle! Det er massivt, helt uten frykt og en altoppslukende opplevelse»
– Bergens Tidende 08.05.15

«Beauty that is hard to express in words»
– Nothing But Hope And Passion 12.02.15

Kontaktinformasjon:
Booking Noreg: kristoffer(a)klangkollektivet.no
PR & Booking Danmark: solgunn(a)klangkollektivet.no
Booking Germany, Austria and Switzerland: christoph(a)popup-records.de
PR & label Germany, Austria and Switzerland: sebastian(a)popup-records.de

 

Lumikide og De Underjordiske på Klubb-Øya

Lumikide og De Underjordiske til Klubb-Øya

Tysdag sparkar ei rekkje klubbar i gong årets Øyafestivalen i Oslo. På Internasjonalen, som for anledningen har flytta scena ut på Youngstorget, får du oppleva både Lumikide (kl. 17.00) og De Underjordiske (DK)(kl. 19.00).

De danske drenge i De Underjordiske gav i vinter ut sitt debutalbum «Ind i Flammerne», etterfulgt at ein suksess av ein norgesturné i april. Lumikide har besøkt Tigerstaden under Klubb-Øya før, som den gong førte til klangsignering. Popkvartetten slepp sitt debutalbum tidleg 2017, som det knyt seg stor spenning til.

Sjåast i Oslo!
Facebook-event

 

Lumikide «Golden»: singel ute 1.juni

Lumikide smyg seg inn i sommarsfæren med første singel frå debutalbumet. Den lovande popkvartetten serverer ein gyllen frisk sommarlåt 1. juni. Singelsleppet markerast med konsert på Landmark i Bergen.

Tilbakelent sommarlykke i støysfæren
Med sfærisk stemme, melodiøse synthlinjer og varm gitarstøy, har Lumikide spelt seg inn i mange norske musikkhjarte dei siste par åra. Intrikate rytmar og støyete gitar kombinert med melodiøse popmelodiar viser ein lovande kvartett i modning, når dei no presenterer første singel frå eit debutalbum det knyt seg stor spenning til.
Lumikide er innom mange inspirasjonskjelder og referansar i sin alternative popmusikk, blant dei kan nevnast Deerhoof, D’Angelo, Tame Impala og Cocteau Twins. Bandet har sidan tittelen Ukas Urørt i 2013 hausta godord frå fleire hald, frå Jørgen Hegstad (P3) som skildrar vokalist Birgitta som “en av de råeste vokalistene i segmentet”, til Jaga Jazzist sin eigen Martin Horntveth om Axel Skalstad: “Norges aller beste trommis om 4-5 år, om han allerede ikke er det”.

Singelsleppet markerast med konsert arrangert av Granbar på Landmark i Bergen, der to andre lovande bergensnamn også er med og feirar singelen; Marinius og Niilas.

Facebook-event

 

Klangkollektivet søkjer bookingagent

Klangkollektivet_klang_studio_bergen_bergenkjøtt_foto_Kristoffer_Øen

Ledig plass i kollektivet! Er du musikkinteressert og har ønske om å jobba med dei mest spanande lovande artistane frå Bergen – med byens mest dedikerte musikkollektiv? Kombinert med struktur, seljareigenskapar og ein vilje til å fordjupa seg i bransjen er du personen me leiter etter.

Klangkollektivet_Klangkollektivet_studio_Bergen_Kjøtt_Foto_Kristoffer_Øen_stilling_leding

Oppgåver som bookingagent:

  • Leggja strategi for booking saman med artist
  • Knyte og opprettholda kontakt med arrangørar og spelestader
  • Delta på bransjetreff i inn- og utland
  • Skaffa spelejobbar og forhandla avtalar
  • Organisera turnéar og enkeltkonsertar på vegne av band, her under reise og produksjon
  • Kontraktsskriving og fakturering
  • Budsjett og rekneskapsarbeid
  • Søknadsskriving og rapportar
  • Samarbeida med resten i Klangkollektivet om artistutvikling, PR, utgivingar etc.

Eigenskapar me ser etter hjå deg:

  • Innsikt/ erfaring frå musikkbransjen, gjerne frå arrangørsida
  • Eit ynskje om å utvikla deg i ein bransje i hyppig utvikling
  • Øyre for ny musikk og ein ivrig konsertgjengar
  • Lyst til å få god musikk ut til folket!

Løn etter avtale.
Søknad og CV sendast før 9. mai til booking@klangkollektivet.no. Nøl ikkje med å ta kontakt for spørsmål eller interesse.